Созақта ауылшаруашалығы еңбеккерлерінің «Алтын күз» мерекесі өтті

273

Созақ ауданының орталығындағы «Даңқ» саяжолында «Алтын күз» ауыл шаруашылығы саласының қорытынды жиыны өтті, деп хабарлайды Аptanews.kz Созақ ауданы әкімдігінің баспасөз қызметіне сілтеме жасап.

Оның аясында арзан бағада азық түлік өнімдерінің жәрмеңкесі, асыл тұқымды мал басының көрмесі, ұлттық спорт түрлерінен жарыстар, үздік өнім алған шаруа қожалықтарымен ауыл окуг әкімдіктері, үздік ауыл шаруашылық мамандары марапатталды.

Мерекелік шарада сөз алған аудан әкімі Салыхан Полатов: «Өндіріспен қатар ауыл шаруашылығы саласы қашанда аудандағы ең маңызды сала болып қала бермек. Елбасы Нұрсұлтан Назарбаев Қазақстан халқына жолдаған Жолдауында: «Агроөнеркәсіп кешенінің әлеуетін толық іске асыру керек. Негізгі міндет-еңбек өнімділігін және қайта өңделген ауыл шаруашылығы өнімінің экспортын 2022 жылға қарай 2,5 есе көбейту деп атап көрсетті. Ауыл шаруашылығы қызметкерлерінің алдында өнім көлемін арттыру секілді үлкен міндет тұр. Оған елдің бірлігі, халықтың ынтымағы және көпшіліктің қажырлы қызметінің арқасында жететін боламыз»,- деп барша аудан тұрғындарын берекелі де, мерекелі «Алтын күз» мерекесімен құттықтап, үздік ауыл округтерімен, шаруа қожалықтарын марапаттады. Сондай-ақ, аудандық мәслихаттың хатшысы Б. Байғараев, аудандық ардагерлер кеңесінің төрағасы Қ. Еспенбетов құттықтау сөз сөйлеп, бірқатар азаматтарға алғыс хат табыс етті.

Жалпы Теріскейлік шаруалар ауданның 90 жылдық мерейтойына орай, жиын терім маусымын жоғары аяқтады деуге толық негіз бар.

Мәселен, биылғы жылдың 9 айында ауыл шаруашылығы саласындағы жалпы өнім көлемі 9 млрд 207,5млн теңге болып, яғни өткен жылдың осы мерзімімен салыстырғанда 856,2 млн теңгеге артып, 110,2 пайыз артық орындалды. Нақты көлем индексі 102,4 пайыз құрады.

Ауыл шаруашылығы саласының негізгі капиталына 20 млн т инвестиция тартылды. Бұл өткен жылғыдан 11 млн 648 мың теңгеге артық.

Жиын соңы аудандық мәдениет үйі өнерпаздарының қойған концерттік бағдарламасына ұласты.